د کابل ښاروالۍ د کار ساتنې او مراقبت ریاست له لوري آزادۍ څلي ته د غځېدلو سړکونو د پراختیا او بیارغونې چارې چې څه موده وړاندې پیل شوې وې، لاهم روانې دي. د یادو سړکونو د بیارغونې او پراختیا په چارو کې د سړکونو د کرښو بېلول، د جدولونو نصب او د ګلدانونو په جوړښت کې بدلون راوستل شامل دي. تر اوسه د کابل- لوګر سړک په پیل کې د ۴۰۰ مترو په اوږدوالي د جدلونو د نصب، د آزادۍ څلي پر لور د کارته نو سړک د ۱۰۰ متر مربع په پراخوالي د بیارغونې او پراختیا او د میوند واټ پر لور سړک د ۳۰۰ متر مربع په پراخوالي د بیارغونې چارې بشپړې شوې دي. دغه راز د کانکریټي جدولونو په اېښودلو سره د میوند واټ تر خولې او د پل محمود خان پر لور د موټرو د تګ مسیرونه بېل شوي دي. کابل ښاروالي د ترافیکي او ترانسپورټي آسانتیاوو رامنځته کول خپل مسئولیت ګڼي، چې په همدې موخه یې د ښار په بېلابېل سیمو کې د پام وړ کارونه ترسره کړي دي.