کابل ښاروال مولوي عبدالرشید، د ښاریانو ستونزو او عریضو ته د رسېدو په موخه، د دې ادارې له یو شمیر مراجعینو سره ولیدل. په دې لیدنه کې کابل ښاروال اړوند مسئولانو ته سپارښتنه وکړه څو د ښاریانو عریضو ته پر وخت رسېدنه وکړي. نوموړي وویل چې، موږ خلکو ته په ریښتیني توګه د خدمت کولو مسئولیت لرو او د ښاریانو قانوني کارونه باید هرڅه ژر ترسره شي. د کابل ښاروال په وینا، د دې ادارې هیڅ مسئول حق نه لري، چې د ښاریانو د قانوني کارونو په ترسره کولو کې پلمې ولټوي او یا ناغیړي وکړي. نوموړي هغه ښاریانو ته چې، ستونزې یې درلودې ډاډ ورکړ چې، د امکاناتو په پام کې نیولو سره به یې ښاري او سیمه ییزو ستونزو ته پر وخت رسېدنه وکړي ، څو دوی ته آسانتیاوې رامنځته او رضایت یې ترلاسه شي.