په یوه غوره تفریحي سیمه د جهان پارک بدلولو او د بګرامیو په منډوي کې د اقتصادې طرحې وړاندې کولو په موخه د کابل ښاروالۍ د پانګه اچونې کمېټې غونډه د کابل ښاروال مولوي عبدالرشید په مشرۍ ترسره شوه. په یاده غونډه کې د جهان پارک په اړه چې په طرحه کې یې د یوه جومات، کلتوري مرکز، معیاري رسټورانت، سوداګریز مارکیټ، سپورتي لوبغالو، د لامبو حوض، تشنابونو او د وسایطو د پارکینګ جوړول، د بلبورډونو او روښنایۍ څراغونو نصب او د زرغونې سیمې پراختیا پکې شامل دي او دغه راز د بګرامیو د منډوي سوداګریزه طرحه چې د سړو خونو، مارکیټ او نورو د اړتیا وړ ځایونو جوړول پکې شامل دي، بحث ته وړاندې شوې. کابل ښاروال وویل چې، د ښار د آبادۍ او پانګه اچونې د ودې په موخه کابل ښاروالي د داخلي خصوصي سکټور لپاره د شپاړلسمې ناحیې اړوند د بګرامیو له منډوي څخه د غوره ګټې اخیستنې په برخه کې غوره آسانتیاوې برابروي، څو په یاده سیمه کې د غوره بدلون شاهدان و اوسو. نوموړي زیاته کړه چې، د جهان پارک لپاره چې د کابل ښار په شمالي سیمه یوولسمه ناحیه کې موقعیت لري، د کابل ښاروالۍ د مشرتابه له لوري هڅې روانې دي، څو یاد پارک په یوه غوره او ډاډمنه تفریحي سیمه بدل شي. کابل ښاروال مسئولانو ته لارښونه وکړه چې، د غوره پلانونو په ترتیب کولو سره دې د پانګه اچونې او د عوایدو د لوړولو په موخه د یادو سیمو د پراختیا او ودې لپاره حقوقي او تدارکاتي ګامونه پورته کړي.