د ښاري فرهنګ د رواجولو او ژوندي کولو په موخه، په ټولنیزو او فرهنګي چاروکې د کابل ښاروالۍ مرستیال مولوي حبیب الرحمن منصور په مشرۍ،د لسمې ناحیې د علماوو، ګذروکیلانو او ځوانانو شوراګانو ته د عامه پوهاوي پروګرام ترسره شو. د کابل ښاروالۍ د ټولنيزو او فرهنګي چارومرستیال د اصیل افغاني او اسلامي فرهنګ د بيا را ژوندي کولو او ترویج کولو په اړه خبرې وکړې ويې ويل: اړینه ده چې موږ ټول د آبادۍ، زرغونتيا، پاکوالي او قانونيت لپاره لاس په کار شو. نوموړي هیله څرګنده کړه چې، د شوراګانو له لارې دې خلک وهڅول شي ترڅو په روان ژمي کې د کابل ښار هوا د ککړتیا مخنیوي او کمولو ته پاملرنه ولري او د ځمکې لاندې اوبو د پیاوړتیا په موخه دې د واورې او باران اوبه زیرمه کړي. همدا راز دکابل ښاروالۍ د خپرونو او عامه پوهاوي رئیس قاري واسع الله زاهد په خپلو خبروکې وویل چې، د عامه پوهاوي د پروګرامونو له جوړیدو څخه یې موخه ،د ښاري فرهنګ را ژوندي کول دي. نوموړي زیاته کړه چې د ګډې همکارۍ په روحیې سره به ډېر ژر کابل ښار د یو عمومي نظم او تل پاتې آبادۍ خاوند شي. د پروګرام په بله برخه کې د دولسمې ناحيې رييس نورالوهاب، د دوه ویشت ګونو ناحیو د وکيلانو د شورا رييس عبدالمجيب صافي، او د خلکو استازو په جلا جلا توګه د مسووليت د احساس لرو په اړه خبرې وکړې او د کابل ښاروالۍ د پروګرامونو او پلانونو په اړه یې خوښي څرګنده کړه. د پرګرام په پای کې د عامه پوهاوي ریاست له خوا د ښاري مسایلو په اړه ویډیويي پیغامونه ګډونوالو ته وړاندې شول.