د چارو د ښه او پر وخت ترسره کېدو په موخه د کابل ښاروالۍ د اداري شورای غونډه د کابل ښاروال مولوي عبدالرشید تر مشرۍ لاندې د مرستیالانو او د مرکزي ریاستونو او ناحیو د رئیسانو په ګډون ترسره شوه. په یاده غونډه کې د استملاکي ستونزو د حل، د یو شمېر ګذرونو د ویش او یوځای کولو او نورو اداري او تدارکاتي موضوعاتو په اړه بحث او خبرې وشوې. کابل ښاروال وویل چې، مسئولان دې هرڅه ژر خپلې اداري او ښاري اړتیاوې یو ځل بیا و ارزوي، څو د کابل ښاروالۍ د ۱۴۰۲ کال په پلان کې ورته ځای ورکړل شي. نوموړي د مسئولانو له لوري د مسئولیتونو په غوره ترسره کېدو ټینګار وکړ او ویې ویل چې، مسئولان دې تر پخوا ډیر خلکو ته د خدمت کولو جوګه وګرځي، څو په دې توګه د ښاریانو رضایت ترلاسه او له بل لوري قانوني ژوند او د معیاري خدمتونو وړاندې کولو ته زمینه برابره شي. ګډونوالو په خپل وار په اداري، حقوقي، سرچینو، همغږۍ او امکاناتو برخو کې خپلې ستونزې، وړاندېزونه او نظرونه د کابل ښاروالۍ له مشرتابه سره شریک کړل