د کابل ښاروالۍ او اطلاعاتو او کلتور وزارت ترمنځ د یوې ګډې ناستې په ترڅ کې، د کابل ښار د یو شمېر مهمو تاریخي ځایونو (بابر بڼ، چهلستون، د تیمورشاه مقبره او بڼ ) د بیارغونې په اړه له بحث او خبرو وروسته لازم تصمیمونه ونیول شول. په دې ناسته کې د اطلاعاتو او کلتور وزارت د هنر او فرهنګي برخې مرستیال عتيق الله عزيزي وويل چې، دکابل د کلتوري ميراثونو او تاريخي آبداتو دساتنې په پار به، يو شمير تاريخي ځايونه بیاورغول شي. نوموړي په دې برخه کې د کابل ښاروالۍ له دوامداره همکارۍ څخه د مننې په ترڅ کې، دا اړینه وګڼله څو دغه اداره په پوره همغږۍ خپلو همکاریو ته دوام ورکړي. همدارنګه په دې کتنه کې د کابل ښاروالۍ د فرهنګي چارو رييس قاري ولي ګل جواد ډاډ ورکړ چې، په کابل ښار کې تاريخي او اسلامي ارزښتونه د کابل ښاروالۍ لومړيتوبونه دي. نوموړي زیاته کړه چې، کابل ښاروالۍ د کابل ښار د تاریخي او لرغونو سیمو د بیارغونې لپاره هر ډول همکارۍ ته چمتو ده او د کابل تاریخي بڼونو ته ځانګړې پاملرنه لري