د افغانستان اسلامي امارت بیرغ ته د درناوي او دښاري ښکلا د رامنځته کولو په نیت، د کابل ښاروالۍ دکلتوري چارو او تنظیف ریاستونو له خوا، ( ۳۶) تختې نوي بیرغونه د کوټه سنګي ( میرویس میدان) د هوایي پله د پاسه نصب شول. د کابل ښاروالۍ د کلتوري چارو رییس قاري ولي ګل جواد وویل چې، دغه بیرغونه د تنظیف ریاست اړوند د ګنډلو په خونه (خیاطي) کې جوړ او چمتو شوي دي. د دغه پله دواړوه خواوې د افغانستان اسلامي امارت او کابل ښاروالۍ په بیرغونو ښکلې کړل شوې او دغه لړۍ به د ښار نورو مهمو سیمو ته هم وغځول شي. همدا راز هغه بیرغونه چې په غیر معیاري توګه په نا مناسبو ځایونو کې ځړول شوي دي، تر را ټولیدو وروسته به په ټاکلو ځایونو ته ولیږدول شي.