د کابل ښار د هوا له ککړتیا څخه د مخنیوي په موخه، د کابل ښاروالۍ د چاپیریال ساتنې برخې د مسئولانو له لوري د ښار په کچه څارنې روانې دي. ډیر شمېر سرغړونکو خپل فعالیتونه اصلاح کړي او له سرغړونکو سره جدي قانوني چلند شوی دی. د مرکز ګرمۍ سیسټم لپاره د لوګي د تصفیې معیاري فلټر نشتون، د چاپیریالي روغتیا په پام کې نه نیول، د زړو وسایلو شتون، خام سړکونه او د ډبرو له سکرو څخه ډېره او بې ځایه ګټه اخیستنه، د کابل ښار د هوا د ککړتیا له لاملونو څخه شمیرل کیږي. د هوا ککړتیا د بېلابېلو ناروغیو رامنځته کېدو سبب ګرځي؛ له دې کبله د کابل ښاروالۍ مسئولان له خپلو شته سرچنو څخه په ګټې اخیستنې، په دې برخه کې هېڅ ډول هڅې نه سپموي.