د ښاري نظم د کمیسیون له لوري د یو لړ ګډو عملیاتو په ترڅ کې، د شپږمې او اوومې ناحیو اړوند د دارالامان، ده دانا، دوغ آباد او چهلستون سړکونه له ښاري بې نظمیو څخه پاک شول. د عملیاتو په لړ کې په سړکونو، پلو لارو او زرغونو سیمو کې خنډونه لرې، ګرځنده پلورنکي او د موټرو خپلسري تم ځایونه چې، د سړک او لارو بندېدو لامل ګرځیدلي وو، ټاکلو ځایونوته له لېږدولو وروسته تنظیم شول. په دغو سیموکې فعالیت کوونکو ته سپارښتنه وشوه، څو خپل توکي په پلو لارو کې ونه پلوري، ځکه د دوی دا کار له ښاري اصولو او مقرراتو سره په ټکر دی او دغه راز د خپلې سیمې چاپیریالي روغتیا ته دې پام وکړي. په یادو سیمو کې یو شمېر سرغړونکي اصناف فعالیت کوي چې د ګڼه ګوڼې او چاپیریالي ککړتیا لامل ګرځیدلي دي. د اوومې او شپږمې ناحیو په ګڼه ګوڼو سیمو کې له دې وروسته ښاري نظم د بېلابېلو تقویتي او حمایوي پروګرامونو له لارې څارل کیږي او له سرغړونکو سره به جدي قانوني چلند وشي