د ښاري فرهنګ په پام کې نیولو ته د ښاریانو د هڅولو او د عامه شتمنیو د ساتنې په موخه د کابل ښاروالۍ د نشراتو او عامه پوهاوي ریاست له لوري د څوارلسمې ناحیې ( پغمان سیمې) له ګذر وکیلانو، ځوانانو او د یادې ناحیې د ډېر شمېر اوسېدونکو په ګډون د کابل ښاروالۍ د ټولنیزو او کلتوري چارو د مرستیال مولوي حبیب الرحمن منصور په مشرۍ د عامه پوهاوي غونډه ترسره شوه. د کابل ښاروالۍ مرستیال د پغمان سیمې ګذر وکیلان د خپلو مسئولیتونو په سمه توګه ترسره کولو ته وهڅول او ویې ویل چې، ګذر وکیلان باید د غصب شویو ځمکو د پېژندلو، زرغونتیا او د نیالګیو کینولو په برخو کې له کابل ښاروالۍ سره اوږه په اوږه کار وکړي او په دې برخه کې هیڅ ډول ناغیړي ونه کړي. د کابل ښاروالۍ د خپرونو او عامه پوهاوي رئیس قاري واسع الله زاهد بیا له دا ډول غونډو څخه موخه ګډو او انفرادي مسئولیتونو ته د ښاریانو هڅول وبلل او ویې ویل چې، ټول باید د خپلې ټولنې پر وړاندې ځان مسئول وګڼو. په غونډه کې د څوارلسمې ناحیې رئیس مولوي غلام محبوب عرفاني، د ۲۲ ګونو ناحیو د ګذر وکیلانو شورای رئیس، د دیني عالمانو، ګذر وکیلانو او ځوانانو استازو خبرې وکړې او د داسې غونډو له جوړېډو یې هرکلی وکړ