د کابل ښار په کچه د نیالګیو کینولو د کمپاین په اړه د چمتوالي غونډه د کابل ښاروال مولوي عبدالرشید په مشرۍ د زرغونتیا ریاست د مسئولانو په ګډون ترسره شوه. په یاده غونډه کې کابل ښاروال د نیالګیو کینولو کمپاین لپاره د زرغونتیا ریاست چمتوالی وستایه او ویې ویل چې، اړینه ده د کابل ښاروالۍ د مسئولانو ترڅنګ ښاریان هم د کابل ښار په زرغونتیا کې برخه واخلي. نوموړي مسئولانو ته لارښونه وکړه چې، د تېرو کلونو په پرتله باید سږ کال د نیالګیو کینولو کمپاین په نوې بڼه هر څه ژر په لاره واچول شي. د کابل ښاروال په وینا، په هغه سیمو کې چې د زرغونتیا وړتیا لري د ناحیو له مسئولانو سره دې په ګډه بېلابېل نیالګي کینول شي، څو ورسره جوخت د کابل ښار په ښکلا او زرغونتیا کې ډیروالی راشي