کابل ښاروال مولوي عبدالرشید تېره ورځ ناوخته د کابل- پروان له لویې لارې تر قرغې سړک پورې د نوي نښلوونکي سړک د جوړېدو په موخه، د یاد سړک له مسیر څخه لیدنه وکړه. کابل ښاروال اړوندو مسئولانو ته سپارښتنه وکړه څو هرڅه ژر د یاد سړک استملاکي چارې بشپړې کړي. نوموړي وویل چې، یاد سړک له ذاکرین ښارګوټي څخه د قمبر څلورلارې تر فامیلو پورې د ۷۶۴۵ مترو په اوږدوالي او د ۳۰ متره پراخوالي سره د پلو لارو، ګلدانونو، استنادي دیوالونو، ترافیکي دهلیزونو او نورو برخو په ګډون د کابل ښاروالۍ د کار، ساتنې او مراقبت ریاست له لوري په بنسټیزه توګه جوړېږي. دا سړک چې د اوولسمې او پنځمې ناحېو ترمنځ جوړېږي، د کابل شمالي برخه له لودېځې برخې سره نښلوي. د دې نښلوونکي سړک په جوړېدو سره به د کابل ښار اقتصادي او معیاري ودې ته زمینه برابره او ورسره جوخت به د کابل خیرخانې کوتل ترافیکي بهیر په وړاندې شته ستونزې هوارې شي. کابل ښاروال له ښاریانو څخه غوښتنه وکړه چې، د سړک جوړولو پروژو په پلي کېدو کې له کابل ښاروالۍ سره مرسته وکړي