د کابل ښاروالۍ، کورنیو چارو وزارت او عامې روغتیا وزارت له لوري د حکومت د رسنیو په مرکز کې د پل سوخته په سیمه کې د ترسره شویو فعالیتونو په اړه خبري کنفرانس ترسره شو. د کابل ښاروالۍ استازي نعمت الله بارکزي وویل چې، په پل سوخته سیمه کې د کابل له سیند څخه په ۲۵ کاري ورځو کې ۷۵۰۰ مټریک ټنه کثافات د کابل ښاروالۍ د زیارکښه تنظیفي کارکوونکو له خوا را ټول او ټاکل شوې ځای ته لیږدول شوي دي. د نوموړي په وینا په یاده سیمه کې تر کثافاتو لاندې لسګونه نا پېژانده جسدونه تر را ويستلو وروسته، د کابل ښاروالۍ دکلتوري چارو ریاست له لوري تکفین او تدفین شوي دي. د ښاغلي بارکزي په وینا، په یاده سیمه کې د روږدو کسانو تر پاکولو وروسته ، ښاري نظم رامنځته شوی او د کټارو او جدولونو رنګ چارې او د پلولارو په تېږو فرش چارې پیل شوې، چې اوس هم دوام لري، څو د دې سیمې ښکلا ډیره او په یوه خوندي ښاري سیمه بدله شي. د کورنیو چارو وزارت ویاند مل پاسوال عبدالنافع ټکور او عامې روغتیا وزارت ویاند ډاکتر شرافت زمان هم په خپل وار خبرې وکړې او ویې ویل چې، د هېواد په کچه د روږدو کسانو د ټولولو بهیر روان دی او له پل سوخته سیمې راټول شوي کسان تر درملنې لاندې دي. دوی هیله وښوده چې، له مخدره توکو سره د مبارزې په برخه کې ورسره ښاریان مرسته وکړي، څو ټولنه او هېواد د مخدره توکو له ګواښونو او زیانونو څخه وساتل شي په پای کې د یادو ادارو د استازو له لوري د خبریالانو پوښتنو ته ځوابونه وویل شول