د نیالګیو کینولو د ملي کمپاین په لړکې، د اوومې ناحیې په کچه د نیالګیو کینولو کمپاین، د دغې ناحیې د رئیس مولوِي سراج الدین، د کابل ښاروالۍ د چاپېریال ساتنې رئیس مولوي یاسر مختار، د علماوو شورا غړو، ګذر وکیلانو، ځوانانو، د حبیبیې لېسې استادانو ، زده کوونکو او ګڼ شمیر ښاریانو له خوا، د سلګونو نیالګیو په کېنولو سره پېل شو. په هغو مراسمو کې چې له همدې امله جوړ شوي وو، یو شمیر ګډونوالو د شنو سیمو او ونو د اهمیت او ارزښت په اړه خبرې وکړې او له ټولو ښاریانو څخه یې غوښتنه وکړه، چې د نیالګیو په کینولو، ساتلو او پالنه کې برخه واخلي. د اوومې ناحیې د خدماتو آمر سمیع الله فاتح وویل چې د یادې ناحیې اړوند د شنو سیمو په پراختیا کې به له هیڅ راز هلو ځلو ډډه ونکړي. همدا راز د حبیبیې لېسې مدیر الفت افغان په خپلو خبروکې ډاډ ورکړ چې، د دې لېسې استادان او زده کوونکي به د خپلې لېسې په انګړ کې له کېنول شویو نیالګیو څخه په دوامداره توګه ساتنه او پالنه کوي. د کابل ښار زرغونتیا یوازې د ښاروالۍ مسوولیت ندی، ټولو ادارو، بنسټونو او ښاریانو ته په کار ده څو په دې برخه کې خپل مسوولیت ادا کړي، ځکه زرغونتیا د ښاري ژوند په ټولو اړخونوکې د اهمیت وړ ده