د کابل ښاروالۍ د خپرونو او عامه پوهاوي ریاست د عامه پوهاوي او اړیکو آمریت له لوري د ښاري موضوعاتو په اړه د غونډو پر دوام، د اوولسمې ناحیې له ګذر وکیلانو، دیني عالمانو، ځوانانو او ګڼ شمیر اوسېدونکو سره د کابل ښاروالۍ د ټولنیزو او کلتوري چارو د مرستیال مولوي حبیب الرحمن منصور په مشرۍ د عامه پوهاوي غونډه ترسره شوه. د کابل ښاروالۍ د کلتوري او ټولنیزو چارو مرستیال ښاریان د ښاري اصولو او مقرراتو پام کې نېولو ته وهڅول او زیاته یې کړه چې، دکابل ښار په سمسورتیا، ښکلا او آبادۍ کې ټول ښاریان مسئولیت لري. نوموړي زیاته کړه چې، د کابل ښاروالۍ مشرتابه د ښاریانو د سوکالۍ او هوساینې لپاره ځاګړي پلانونه تر لاس لاندې لري چې، یو پر بل پسې به یې پلي کړي. د کابل ښاروالۍ د خپرونو او عامه پوهاوي رئیس قاري واسع الله زاهد، په خپلو خبرو کې د ښاري فرهنګ په پام کې نیول یو اصل وباله او ښاریان یې د ښار سالم مدیریت ته را وبلل. ښاغلي زاهد زیاته کړه چې، ټول باید د یوه آباد او قانونمند ښار درلودلو لپاره اوږه په اوږه کار وکړو او په ښاري ژوند کې یې د اوبو، هوا او خاورې د ارزښت په اړه ګډونوالو ته معلومات وړاندې کړل. د اوولسمې ناحیې رئیس مولوي حبیب الحق حقاني، د دوه ویشت ګونو ناحیو د ګذر وکیلانو شورا رئیس، یوشمیر دیني عالمان او ګذر وکیلان د غونډې نور ویناوال وو، چې هر یوه په خپلو خبرو کې د کابل ښاروالۍ له پروګرامونو او پلانونو څخه خپل ملاتړ اعلان کړ. د غونډې په پای کې د ښاري فرهنګ په اړه یو شمېر ویډیويي کلپونه نندارې ته وړاندې شول چې، د ګډونوالو د خوښې وړ وګرځېدل