د کابل ښار د سمسورتیا او زرغونتیا په موخه، په پنځمه ناحیه کې د نیالګیو کېنولو کمپیاین د کابل ښاروالۍ د کلتوري او ټولنیزو چارو د مرستیال مولوي حبیب الرحمن منصور، د ښاري خدمتونو او چاپېریال ساتنې مرستیال مولوي محمد خالد سجستاني او د څه باندې ۵۰۰۰ تنه ښاریانو په ګډون، د قرغې- کمپنۍ نښلوونکي سړک په اوږدو کې د (۷۰۰۰) نیالګيو او زینتي بوټو په کېنولو سره ترسره شو. د کابل ښاروالۍ د ټولنیزو او کلتوري چارو مرستیال وویل: که هر ښاري یو نیالګی کېنوي او له هغه سمه ساتنه وکړي، ډېر ژر به د زرغون او ښایسته کابل شاهدان و اوسو. نوموړي د نیالګیو کېنول د ښو انسانانو خاصیت وباله او هیله یې څرګنده کړه چې، د دنیا او آخرت د اجر په موخه باید یو نیالګی کېنوو او ساتنه ترې وکړو. د ښاري خدمتونو او چاپېریال ساتنې مرستیال بیا په خپلو خبرو کې د زرغونو سیمو په پراختیا کې د ښاریانو رول اړین وباله. ښاغلی سجستاني وویل چې، کابل ښاروالي به د ښاریانو په مرسته د کابل ښار بڼې ته مثبت بدلون ورکړي. د یادونې وړ ده چې، د کابل ښاروالۍ د زرغونتیا ریاست به د ونو د خړوب په برخه کې له بېلابېلو لارو او سیستمونو کار واخلي. د څاڅکو سیسټم فعالول او په لښتیو کې د اوبو د تصفیې سیسټم رامنځته کول د یاد ریاست تر کار لاندې پروګرامونه دي چې، په دې توګه به له کارول شویو اوبو څخه د ونو په خړوب کې ګټه پورته کړل شي.