د زرغونو سیمو د پراخه کېدو او د کابل ښار د ښکلا په موخه د اتمې ناحیې په اړوند سیمو کې د کابل ښاروالۍ د زرغونتیا ریاست د رئیس، د اتمې ناحیې د رئیس مولوي عبدالحی حکیمي، ګذر وکیلانو، دیني عالمانو او ځوانانو په ګډون په رحمن مېنه کې د نیالګیو کېنولو چارې پیل شوې. په یادو مراسمو کې د کابل ښاروالۍ د زرغونتیا رئیس په خپلو خبرو کې ښاریان د نیالګیو خړوب او ساتنې ته راوبلل او زیاته یې کړه چې، زرغونې سیمې د انسان په ژوند کې خورا ډېر ارزښت لري او له زرغونو سیمو پرته ښاري ژوند له ننګونو سره مخ کیږي. د نوموړي په وینا د نیالګيو کېنول صدقه ده او ونې ته اوبه ورکول تږي انسان ته د اوبو ورکولو مانا ورکوي. د اتمې ناحیې رئیس په خپلو خبرو کې وویل چې، د یادې ناحیې زرغونو سیمو ته پراختیا ورکول کیږي او د یادې ناحیې په اړوند سیمو کې به زرګونه نیالګي او زینتي بوټي کېنول شي. د اتمې ناحیې د ګذر وکیلانو شورای مرستیال محمد عمران امیري ژمنه وکړه چې د زرغونو سیمو په ساتنه کې به له کابل ښاروالۍ سره مرسته کوي او د یادې ناحیې د اوسېدونکو په ملاتړ به بېلابېل نیالګي کینوي او ساتنه به یې کوي