د ښاري ښکلا پروګرامونو پر دوام د وزیرمحمد اکبرخان څلورلارې د ښکلا چارې چې څه موده وړاندې پیل شوې وې، لاهم روانې دي. د کابل ښاروالۍ د کلتوري چارو رئیس قاري ولي ګل جواد وايي چې، د هوا له ښه کېدو سره سم د ښاري ښکلا پروګرامونو د پلي کولو چارې بیا پیل شوې دي. د کلتوري چارو ریاست له لوري د ( افغان یوناتید بانک) په مرسته په وزیرمحمد اکبرخان څلورلارې کې د ۹ متره په لوړوالي یو سمبول چې په سر کې یې د ۲ مترو په قُطر یو څراغ په نظر کې نیول شوی دی جوړیږي. د سمبول شاوخوا د اوبو فوارې، زرغونتیا، د کټارو نصبول او رنګول او د زینتي تیږو نصبول په نظر کې نیول شوي دي چې، په بنسټیزه توګه به یې چارې تر راتلونکې یوې میاشتې پورې بشپړې شي. ښاغلي جواد وویل چې د کابل ښاروالۍ له لوري به د ښار په ډېرو نورو مسیرونو کې هم د ښاري ښکلا پروګرامونه پلي شي. د نوموړي په وینا دوی هڅه کوي څو د کابل ښار په بڼه کې غوره بدلون راولي او خلکو ته د روښانه راتلونکې زیری ورکړي