د کابل ښاروالۍ مقام په وړاندیز او د ریاست الوزرا محترم مقام د حکم له مخې ښاغلی مولوي عبدالغفور د اوومې ناحیې د رئیس، د اوومې ناحیې پخوانی رئیس مولوي سراج الدین تبدیلا د دولسمې ناحیې د رئیس په توګه او ښاغلی مولوي محمود د دولسمې ناحیې د مرستیال په توګه وټاکل شول او د کابل ښاروالۍ مقام د دفتر د رئیس حافظ عبدالقدیر حقاني له لوري کارکوونکو ته ور وپېژندل شول. د کابل ښاروالۍ مقام د دفتر رئیس وویل چې، یادې ټاکنې د وړتیا پر بنسټ ترسره شوې دي او زیاته یې کړه چې، بدلون په اداره کې یو اصل دی څو په دې توګه د کابل ښاروالۍ مسئولان د خدمتونو وړاندې کولو او د وضعیت د غوره بدلون په برخو کې له ریښتینولی کار واخلي. نوموړي دغه راز وویل چې، ناحیې په ښار کې د کابل ښاروالۍ سیمه ایزې ادارې دي او مسئولان یې باید خلکو ته غوره چوپړتیاوې وړاندې کړي. نویو ټاکل شویو مسئولانو هر یوه په خپل وار ژمنه وکړه چې، د خدمتونو وړاندې کولو په برخه کې به هېڅ راز هڅې دریغ نه کړي او د خلکو د رضایت ترلاسه کولو لپاره به غوره کړنې ترسره کړي