د زرغونو سیمو د پراختیا او ښاري ښکلا په موخه د کابل ښاروالۍ د کلتوري چارو ریاست له لوري د پغمان په عمومي بڼ او ور څېرمه سیمو کې د نیالګیو کېنولو لوی کمپاین د زرګونو نیالګیو په کېنولو، نښې ویشتلو او د لوبغاړو له لوري د نندارو په وړاندې کولو ترسره شو. په دې کمپاین کې چې، دیني عالمانو، ګذر وکیلانو، لوبغاړو او ځوانانو ګډون کړی وو، د کابل ښاروالۍ د کلتوري چارو رئیس قاري ولي ګل جواد د اسلام له نظره د نیالګیو کېنولو په ارزښت خبرې وکړې او ویې ویل چې، زرغونې سیمې د انسان د روغتیا په برخه کې اغیزمن رول لري. نوموړي زیاته کړه چې، د لوبو نندارې یې نیالګو کېنولو ته د ښاریانو د هڅونې په موخه په لاره اچولې دي، څو په دې توګه د ښار په کچه زرغونې سیمې پراخه شي. د څوارلسمې ناحیې رئیس مولوي غلام محبوب عرفاني نیالګیو کېنولو ته د یادې ناحیې اوسېدونکي وهڅول او ویې ویل چې، د پغمان تفریحي سیمې په بېلابېلو برخو کې به زرګونه نیالګي او زینتي بوټي کېنول شي او په دوامداره توګه به یې ساتنه وکړي. د ښاغلي عرفاني په وینا د یادې ناحیې مسئولان به د پغمان تفریحي سیمې په بېلابېلو برخو کې خلکو ته د آسانتیاو رامنځته کولو په برخه کې هېڅ راز هڅې دریغ نه کړي