ښاریانو ته د ښاري او ترانسپورټي آسانتیاو رامنځته کولو په موخه، د کابل ښاروالۍ له لوري او د ملګرو ملتونو د پروژوي دفتر (UNOPS) په مرسته د نهمې ناحیې په څوارلسم ګذر کې د یوه فرعي سړک د جوړولو چارې پیل شوې. د نهمې ناحیې رئیس حافظ حیات الله حیات وویل چې، دا سړک د ۱۲۸۰ متره په اوږدوالي او په منځنۍ کچه د ۴ مترو په پراخوالي د لښتیو په ګډون جوړیږي چې، قلعه عمرخان له قلعه وکیل او څلورم مکروریان سره نښلوي. نوموړي په نږدې ورځو کې د یادې ناحیې په اړوند سیمو کې د څو نورو سړکونو د جوړېدو خبر هم ورکړ او زیاته یې کړه چې، د یادو سړکونو په جوړېدو سره به د سیمې د اوسیدونو پر وړاندې شته ترانسپورټي او چاپیریالي ستونزې حل شي. د کابل ښار د دوه ویشت ګونو ناحیو د ګذر وکیلانو شورا رئیس عبدالمجیب صافي د کابل ښاروالۍ له مشرتابه څخه د مننې ترڅنګ وویل چې، د سیمې اوسیدونکي له داسې پروژو د هرکلي سربیره، د کابل ښاروالۍ له ټولو پلانونو او پروګرامونو څخه په کلکه ملاتړ کوي