د کابل ښاروالۍ زرغونتیا رياست له سالنګ واټ څخه د دهن باغ تر څلورلارې پورې سړک په اوږدو کې په سلګونو نيالګي کېنول، چې ساتنه او پالنه به يې په معياري ډول ترسره شي. د کابل ښاروالۍ د زرغونتیا رئیس مولوي عبدالوکیل متوکل په دې اړه وویل: د نيالګيو دکېنولو د موسم په را رسيدو سره، دغه کار د ياد سړک په اوږدو کې د ونو د کمښت له امله ترسره شوى او د هغو ونو پرځای چې، پخوا د ترافيکي پيښو او يا د نباتي ناروغيو له امله له منځه تللې دي، د دغه رياست په قوریو کې روزل شوي نيالګي کېنول شوي دي. د ښاغلي متوکل په وینا، دغه نيالګي د یاد سړک په ګلدانونو کې د کېنولو او ښايست لپاره مناسب دي چې، د زرغونتیا رياست له خوا به يې پر وخت څارنه او پالنه وشي. نوموړي هيله څرګنده کړه چې، ټول ښاریان باید په ښار کې د نیالګیو او ونو په خړوب، ساتنه او پالنه کې د کابل ښاروالۍ له زرغون اغوستونکو سره مرسته وکړي