په ١٣مه ناحيه کې د نيالګيو ايښودلو کمپاين د کابل ښاروالۍ د ودانیزو چارو مرستيال انجنير عامر ياسر زمرک، د علماوو، ګذروکيلانو او د دې ناحیې د ځوانانو شوراګانو د غړو په ګډون ترسره شو. په هغه مراسمو کې چې له همدې امله جوړ شوي وو، د کابل ښاروالۍ د ودانیزو چارو مرستیال د نيالګيو ايښودلو په ارزښت او اهمیت خبرې وکړې او ويې ويل: د کابل ښاروالۍ د زرغونتیا رياست په ١٣مه ناحيه کې د زرغونو سیمو د پراختيا په موخه، د دې ناحیې په بېلابېلو سيمو کې د زرګونو نيالګيو کېنولو ته چمتووالى لري. نوموړي د دې سیمې له اوسېدونکو څخه چې، د خپلو سیمو په زرغونتیا کې یې ونډه اخیستې مننه وکړه او د یوه زرغون او ښکلي کابل په جوړولو کې یې د ښاریانو رول مهم او ارزښتناک وباله. د يادونې وړ ده، چې تر دې وړاندې هم د ديارلسمې ناحيې يو شمېر اوسېدونکو د خپلو سیمو د زرغونتیا په موخه، د بېلابېلو ډولونو (۲۸۵) نيالګي مرسته کړې ده