کابل ښاروالۍ د برابرې او دوامدارې پراختیا د اصولو پر بنسټ، د ۲۲مې ناحیې اړوند د بټ خاک له څلورلارې (ملالۍ څلورلارې) تر حلقوي سړک پورې د نوي نښلوونکي سړک لومړنۍ چارې پیل کړې. د کابل ښاروالۍ د زیربنايي پروژو د څارنې د آمر انجنیر محمد حامد سادات په وینا؛ دغه مهم نښلوونکی سړک (۱۳۲۵) متره اوږدوالی او (۴۵)متره سور لري چې، د یوه معیاري سړک د ټولو برخو په ګډون به د (۷۶) میلیونه افغانیو په لګښت د (۱۲) میاشتو په موده کې په اساسي بڼه جوړ شي. د یاد سړک په اوږدو کې (۷۰) ملکیتونه تر استملاک لاندې دي چې، د استملاک قانون له مخې یې (۹۰) سلنه مالکانو ته حقونه ورکړل شوي دي او پاتې نور به یې هم ترلاسه کړي. د دې سړک په اوږدو کې د خنډونو او یو شمېر استملاکي کورونو د ویجاړولو کارونه مخکې ترسره شوي او د پاتې برخې به یې هم ډېر ژر ترسره شي. دغه سړک د کابل ښاروالۍ د ښاري زیربناوو ریاست له لوري تر تخنیکي او فني مطالعاتو وروسته په معیاري توګه ډیزاین شوی چې، په جوړېدو سره به یې ښاریانو ته ګڼ شمېر آسانتیاوې رامنځته او د بت خاک څلورلارې او ورڅېرمه سیمو په ترافیکي بهیر کې به د پام وړ بدلون رامنځته شي