د کابل ښاروالۍ زرغونتیا ریاست د کابل ښار د زرغونو سیمو د پراختیا په موخه، د زرغون کمربند په دوام په تنګي غارو سېمه کې دڅه باندې پنځوس زره میوه لرونکو او بې میوې نیالګيو کېنول، تر لاس لاندې لري. د کابل ښاروالۍ د زرغونتیا رئیس مولوي عبدالوکیل متوکل په دې اړه وویل: د ځنګلونو او زرغونو سېمو رامنځته کول، له یوې خوا د اورښتونو او بارانونو په موسم کې د اورښت لامل کېږي او له بلې خوا زرغون کمربند بیا په حقیقت کې د چاپېریال لپاره د فلټر حیثیت لري، په همدې موخه د کابل ښاروالۍ د زرغونتیا ریاست کارکوونکي د زرغون کمربند پروژې د تنګي غارو په غونډیو کې، په (۲۱۰) هکتاره ځمکه کې د شاوخوا (۱٠۵) زره میوه لرونکو او بې میوې نیالګیو په خړوبولو او پالنه بوخت دي. نوموړي زیاته کړه، چې په ياده سيمه کې د زرغونو سیمو د پراختيا او د ښکلي کابل رامنځته کولو په موخه، اوس تر(٥٠) زره زياتو نیالګیو د کېنولو چارې روانې دي څو دغه سېمه په يوه مناسب او ښکلې تفريحي ځای بدله شي. د یادونې وړ ده چې، د تنګي غارو په غونډیو کې زرغون کمربند اوس د اوبو د یوې زیرمې له لارې خړوبېږي، او په روان کال کې به د ونو او نیالګیو د خړوبولو په نیت د اوبو یوه بله زېرمه هم جوړه شي