د کابل ښاروالۍ له خوا او د ملګرو ملتونو د پروژوِي خدمتونو د دفتر په مرسته، د پنځلسمې ناحیې اړوند د ۲۱م ګذر د نوي خواجه بغرا په سیمه کې د یو سړک د جوړولو چارې پیل شوې. د پنځلسمې ناحيې مرستيال مولوي سراج الدين په دې هکله وويل: دغه سيمه له ښاري آسانتياوو څخه بې برخې ده، چې د دې پروژې په پلي کېدو سره به يې د اوسېدونکو ستونزې هوارې شي او دوی به ټولنيزو او ښاري آسانتياوو ته لاسرسی ومومي. د کابل ښاروالۍ د پروژو او برنامو د تنظیم ریاست استازي انجنیر ذبیح الله رحیمي وویل: دغه سړک (۴۰۰) متره اوږدوالی او (۷،۵) متره سور لري چې دسړک غاړې لښتي په ګډون به، د (۷۵ ) کاري ورځو په موده کې په اساسي ډول جوړ شي. په ورته وخت کې محمد امين حقجو د۲۱م ګذر وکیل د یادې سیمې د اوسېدونکو په استازيتوب ددغې پروژې له پلي کېدو څخه خوښي څرګنده کړه او ژمنه يې وکړه چې، د دغې پروژې په ترسره کېدو کې به دکابل ښاروالۍ له اړوندو مسئولینو سره همکاري وکړي. د یادونې وړ ده چې، د دې پروژې له لارې په ياده سيمه کې د يو شمېر ښاریانو لپاره کاري زمینه هم برابره شوې ده
په پنځلسمه ناحیه کې د یوه سړک د جوړولو چاري پیل شوي