د ښار په زرغونتیا کې د بنسټونو او ادارو د برخې اخیستنې پر دوام، حمزه خیریه بنسټ د ۶۵۰ بېلابېل ډوله نیالګیو په چمتو کولو سره چې، د څلورمې ناحیې په شهرنو او د تایمنی پروژې د پنځم ګذر په پارکونو کې کېنول شول، د ښار په زرغونتیا کې برخه واخیسته. د څلورمې ناحیې رئیس مولوي عبدالرحمن رباني په دې اړه وویل: د څلورمې ناحیې پارکونه او زرغونې سیمې به د ښاریانو په مرسته پراختیا ومومي؛ ځکه د دې ناحیې ښاریان له کابل ښاروالۍ سره همکار دي. نوموړي د یاد بنسټ او د یوه خصوصي ښوونځي له زده کوونکو چې، د نیالګیو په کېنولو کې یې مرسته کړې وه مننه وکړه. ورته مهال د زرغونتیا ریاست مرستیال سراج الدین پټان وویل: ټاکل شوې ده د ښاریانو او بېلابېلو ادارو په مرسته د ښار په کچه د زرغونتیا پلانونه پلي او کابل ښار به په یوه ښایسته او سمسور ښار بدل شي. نوموړي زیاته کړه، د حمزه خیریه بنسټ له لوري په چمتو شویو نیالګیو کې د مورپان، دیوار بید، شمشاد او مرسل ګلان شامل دي چې، د شهر نو او تایمنی پروژې د پنځم ګذر په پارکونو کې په معیاري توګه کېنول شول