د کابل ښاروالۍ له لوري د درېیمې ناحیې اړوند له دهمزنګ څخه تر کوټه سنګي(میرویس میدان) پورې د سړک د جوړولو او پراختیا پر وړاندې د شته خنډونو (استملاکي ملکیتونو) د پاکولو چارې روانې دي. د کابل ښاروالۍ د برنامو او پروژو د تنظیم ریاست د معلوماتو پر بنسټ؛ دغه سړک چې، (۳۲۲۶) متره اوږدوالی او (۳۰) متره سور لري، د جوړولو او پراختیا چارې به یې د خنډونو تر پاکولو وروسته پیل، او د (۱۴) میاشتو په موده کې بشپړې شي. د یاد سړک په اوږدو کې (۵۵) ملکیتونه تر استملاک لاندې دي چې، د استملاک قانون له مخې به یې مالکانو ته بدیل حقونه ورکړل شي. دغه سړک د کابل ښار یو له مهمو مرکزي سړکونو څخه شمېرل کیږي چې په همدې موخه یې د ماسټر له مخې د پراختیا په اړه اقدام وشو