د ۱۹مې ناحیې په ۲م ګذر کې په څرخي پله پورې اړوند د ملا محمد بابا سیمې د کوڅو جوړولو چارې بشپړې او د ۱۹مې ناحیې د رئیس مولوي عبدالغفور فاتح او دکابل ښاروالۍ د برنامو او پروژو د تنظیم ریاست د استازي انجنیر ذبیح الله رحیمي لخوا په داسې حال کې چې، د سیمې مشران او یو شمېر اوسېدونکو هم حاضر وو ګټې اخیستنې ته وسپارل شوې. په دې اړه جوړو شویو مراسمو کې د نولسمې ناحیې رئیس د خپلو خبرو په ترڅ کې وویل: د دغو کوڅو په جوړېدو سره د سیمې د اوسېدونکو په وړاندې ستونزې حل او دوی ته ټولنیزې آسانتیاوې رامنځته شوې دي. نوموړي دسیمې له اوسېدونکو غوښتنه وکړه چې، د نویو جوړو شویو کوڅو ساتلو ته پام وکړي او ژمنه یې وکړه چې، ورته نورې پروژې به هم په یاده سیمه کې پلې شي. ورته مهال د پروژو او برنامو د تنظیم ریاست استازي وویل: د لښتیو په ګډون دغه کوڅې چې، په ټولیزه توګه ((۱۴۴۵)متره اوږدوالی او له (۳ څخه تر ۴،۵) مترو پورې سور لري، د کابل ښاروالۍ له لوري او د ملګرو ملتونو د پروژوي خدمتونو د دفتر په مرسته، له ښاري آسانتیاوو څخه د محرومو سیمو اوسېدونکو ته د کاري بوختیاوو او آسانتیاوو رامنځته کولو په موخه، د (۸،۶) میلیونه افغانیو په لګښت، د (۹۰) کاري ورځو په ترڅ کې په بنسټیزه توګه جوړې شوې دي