د کابل ښاروالۍ لخوا د ښاریانو په مرسته، د نهمې ناحیې اړوند هوايي ډګر له څلورلارې څخه د کابل- جلال آباد سړک په اوږدو کې تر ګمرک سیمې پورې د نوي نښلوونکي سړک د جوړېدو پر وړاندې شته خنډونو ( استملاکي ملکیتونو) د پاکولو چارې روانې دي. د کابل ښاروالۍ دبرنامو او پروژو د تنظیم ریاست د معلوماتو پر بنست؛ دغه سړک چې، (۲۷۹۴) متره اوږدوالی او (۶۰) متره سور لري، دماستر پلان له مخې به د یوه معیاري سړک د ټولو برخو په ګډون د (۲۰) کاري میاشتو په موده کې جوړ شي. د کابل ښار د معیاري ودې په موخه، د یاد سړک جوړول یو لومړیتوب وو چې، د کابل ښاروالۍ له لوري یې د جوړولو په اړه اقدام وشو. د دغه سړک په اوږدو کې (۵۰۱) ملکیتونه تر استملاک لاندې دي چې، د استملاک قانون له مخې به یې مالکانو ته بدیل حقونه ورکړل شي. کابل ښاروالي له ټولو ښاریانو غوښتنه کوي ترڅو د دې ټولګټې پروژې په پلي کېدوکې ورسره مرسته وکړي