د کابل ښاروالۍ د زرغونتیا ریاست له خوا، د شپاړلسمې ناحیې اړوند لومړيو مکروریانو ته د غځیدلو سړکونو په ګلدانونو کې د سلګونو نیالګیو او ګنډېري ګلانو د کېنولو چارې روانې دي. د شپاړلسمې ناحيې رئیس مولوي محمد عارف کمالي په دې اړه وويل: دغه نيالګي او ګلان د بي بي حاجي سرای، د ملي بس څلورلارې او لومړيو مکروريانو ته د غځېدلو سړکونو په ګلدانونو کې د دې رياست د کار کوونکو له لوري په معياري ډول کېنول کېږي تر څو د یادو سیمو ښکلا او سمسورتیا نوره هم زیاته شي. نوموړي د یادو سیمو له اوسېدونکو غوښتنه وکړه، چې د زرغونو سيمو د ګلونو، نيالګيو او ونو په ساتنه کې د کابل ښاروالۍ له اړوندو کارکوونکو سره مرسته وکړي