د لسمې ناحیې مسئولینو د دې ناحیې اړوند د هوایي سړک په اوږدو کې د هوشمند ښارګوټي ته څېرمه، شاوخوا (۵۶) جریبه غصب شوې ځمکه بېرته را وګرځوله. د لسمې ناحیې مرستیال قاري عبدالحي شهیدزي په دې اړه وویل: یو شمېر غاصبانو او فرصت غوښتونکو کلونه وړاندې په بېلابېلو پلمو دغه ځمکه غصب کړې وه او په هغه کې یې ناقانونه تاسیسات جوړ کړي وو چې، تر پېژندلو وروسته یې د بېرته راګرځولو به اړه اقدام وشو او اوس مهال د کابل ښاروالۍ په واک کې ده. نوموړي زیاته کړه، یاده ځمکه د کابل ښاروالۍ اړوند په یوه غیر پلاني سیمه کې پرته ده چې په راتلونکې کې به د پراختیایي پلانونو پلي کېدو ته چمتو شي. کابل ښاروالۍ د غصب شویو ځمکو د بېرته راګرځولو په برخه کې ژمنتیا لري او فرصت غوښتونکو او له قانون څخه سرغړوونکو ته وخت نه ورکوي ترڅو له دولتي ځمکو او عامه ملکیتونو ناوړه ګټه پورته کړي