ښاریانو ته دترانسپورټي او ښاري آسانتیاوو رامنځته کولو په موخه، د شپږمې ناحیې اړوند د ۲۱م ګذر په قلعه عین الله سیمه کې د کوڅو جوړولو چارې د کابل ښاروالۍ له لوري او د ملګرو ملتونو د پروژوي خدمتونو د دفتر په مرسته پیل شوې. د کابل ښاروالۍ د برنامو او پروژو د تنظیم ریاست د مسئولینو په وینا؛ دغه کوڅې چې په ټولیزه توګه (۱۰۲۸) متره اوږدوالی او له (۳ څخه تر ۳،۵) مترو پورې سور لري، د لښتي په ګډون به یې د جوړولو چارې د کابو (۳) میاشتو په موده کې بشپړې شي. د دغو کوڅو په جوړېدو سره به د سیمې د اوسېدونکو موسمي ستونزې حل او ګڼ شمېر ښاري آسانتیاوو ته به لاس رسی ومومي. د یادونې وړ ده چې، په دې پروژه کې یو شمېر ښاریانو ته د کار زمینه هم برابره شوې ده