د کابل ښاروالۍ له لوري له دارالامان ماڼۍ څخه د ګل باغ ترپله پورې د (۳۲۰۰) مترو په اوږدوالي او (۳۳) مترو په سور سره د ګلباغ سړک د لومړۍ برخې د کېندلو، خنډونو پاکولو او خاورې لېږدولو چارې روانې دي. د کابل ښاروالۍ د برنامو او پروژو د تنظیم ریاست د معلوماتو له مخې؛ په اوومه ناحیه کې دغه مهم نښلوونکی سړک چې، لښتي، ګلدانونه، پلې لارې، د بایسکل چلولو لیکې، د روښنایۍ څراغونه او د یوه معیاري سړک نورې برخې هم پکې شاملې دي؛ د (۱۴) میاشتو په موده کې به په بنسټیزه توګه بشپړ شي. دغه سړک چې د کابل لوېدیځ له سویل سره نښلوي په راتلونکې کې به د شلمې ناحیې اړوند د کابل- لوګر تر سړک پورې دوام ومومي. یاد سړک د کابل ښار یو له مهمو سړکونو څخه بلل کیږي چې، په جوړېدو سره به یې د کابل ښار اقتصادي او معیاري ودې ته زمینه برابره شي