د دولسمې ناحیې اړوند په احمدشاه بابا مېنه کې د ۱۳م، ۱۴م، ۱۵م او ۱۶م بلاک ترمنځ د نښلوونکي سړک د جوړولو چارې چې، د ځینو لاملونو له امله ځنډېدلې وې، د کابل ښاروالۍ د کار، ساتنې او مراقبت ریاست له خوا بیاځلې پیل شوې. د کار، ساتنې او مراقبت ریاست د پلونو او سړکونو د آمر انجنير محمد داؤد ځواب په وینا، دغه سړک (۲۸۶۰) متره اوږدوالى او (۴۰) متره سور لري، چې، د لښتیو، پلولارو، د بايسکل چلولو کرښو او نورو جزئياتو په ګډون به د روان کال په بهیر کې بشپړ شي. نوموړي زياته کړه: د دغه سړک (١٢٠٠) متره برخه قیر ته چمتو شوې او د پاتې نورو برخو د جوړولو چارې یې روانې دي