د کابل ښاروالۍ د کار، ساتنې او مراقبت ریاست له لوري له ذاکرین ښارګوټي څخه تر قرغې سړک پورې د نوي نښلوونکي سړک د جوړولو چارې روانې دي. دغه سړک چې، (۷۶۴۵) متره اوږدوالی او (۳۰) متره سور لري، اوولسمه او پنځمه ناحیه سره نښلوي او چارې یې تېر کال پیل شوې وې. د یاد سړک یوه کرښه د(۲) کیلو مترو په اوږدوالي تېر کال قیر شوې ده او اوس مهال یې د پاتې بنسټیزو برخو د جوړولو چارې روانې دي ترڅو قیر کولو ته چمتو شي. د دغه سړک په اوږدو کې د غره د لمنې هوارول د کار د ځنډېدو لامل ګڼل شوی، خو هڅه کیږي ترڅو یې په روان کال کې د استنادي دېوالونو، پلو لارو، ګلدانونو او تم ځایونو د جوړولو چارې بشپړې او ګټې اخیستنې ته وسپارل شي. پاتې دې نه وي چې د دغه سړک په جوړېدو سره به له یوې خوا د کابل ښار شمالي برخه له لوېديځې برخې سره ونښلول شي او بل خوا به د سرای شمالي او خیرخانې کوتل سیمو په ترافیکي ګڼه ګوڼه کې د پام وړ کموالی راشي