د بنسټیزو او ټولګټو پروژو د پلي کولو په موخه، د کابل ښاروالۍ د ودانیزو چارو د مرستیال انجنیر عامر زمرک یاسر په حضور کې د دیارلسمې ناحیې اړوند له امید سبز ښارګوټي څخه تر عرفاني سړک ( برچي سیمې) او بیا تر قلعه قاضي پورې د نویو نښلوونکو او اصلي سړکونو د جوړولو پر وړاندې د شته خنډونو او استملاکي ملکیتونو د پاکولو چارې پیل شوې. د کابل ښاروالۍ د ودانیزو چارو مرستیال وویل: د ماسټر پلان له مخې د یادو سړکونو جوړول، د کابل ښاروالۍ لومړیتوب او د کابل ښاریانو پخوانۍ هیله ده چې، اوس یې د جوړولو په اړه اقدام وشو. ښاغلي یاسر د سیمې له اوسېدونکو غوښتنه وکړه چې، له کابل ښاروالۍ سره دې د سړک جوړونې د مهمو پروژو په پلي کولو کې مرسته وکړي. ورته مهال د کابل ښاروالۍ د استملاک رئیس انجنیر عبدالمتین حنیف وویل: د یادو سړکونو په اوږدو کې میشتو اوسېدونکو ته تر ورکړل شوې خبرتیا وروسته تر استملاک لاندې د (۵۸۷) ملکیتونو او نورو خنډونو د پاکولو چارې پیل شوې چې، د قانون له مخې به یې مالکانو ته بدیل حقونه ورکړل شي. دغه راز د کابل ښاروالۍ د برنامو او پروژو د تنظیم رئیس انجنیر میرالرحمن ناصري په دې اړه وویل: د ډیزاین له مخې له امید سبز ښارګوټي څخه تر عرفاني سړک پورې نوی جوړېدونکی سړک (۳۷۲۰) متره اوږدوالی او (۴۵) متره سور، او له قلعه قاضي څخه د حلقوي سړک تر اوږدو پورې سړک (۱۱۷۰) متره اوږدوالی او (۲۰) متره سور لري چې د (۳۰۲) میلیونه او (۴۶۴) زره افغانیو په لګښت به د (۲۲) میاشتو په موده کې په بنسټیزه توګه جوړ شي. د دې سړک په جوړېدو سره به ښاریانو ته د تګ راتګ په برخه کې ګڼ شمېر آسانتیاوې رامنځته او په ترافیکي ګڼه ګوڼه کې به د پام وړ کموالی راشي. له دې سربېره به د دغو پروژو په پلي کېدو سره د دیارلسمې ناحیې د اړوند سیمو اقتصادي ودې ته زمینه هم برابره شي