د کابل ښاروالۍ له لوري د شپږمې او اوومې ناحیې اړوند د ۳۱۷۶ مترو په اوږدوالي او د ۳۳ مترو په سور سره له دارالامان ماڼۍ څخه تر فیصل ښارګوټي پورې د ګل باغ سړک د لومړۍ برخې د جوړولو او پراختیا چارې پیل شوې. د کابل ښاروالۍ د پروګرامونو او پروژو د تنظیم ریاست د مسئولانو په وینا؛ دا سړک به د لښتیو، ګلدانونو، د بایسکل چلولو لیکو، د روښنایۍ څراغونو او د یوه معیاري سړک د نورو برخو په ګډون د یوه کال په موده کې په بنسټیزه توګه جوړ شي. د ګلباغ سړک چې، کابل له سویل سره نښلوي په راتلونکې کې به یې چارې د شلمې ناحیې اړوند د کابل- لوګر سړک تر اوږدو او چهل دختران سیمې پورې وغځول شي. دا سړک د کابل ښار یو مهم سړک دی چې، په جوړېدو سره به یې د کابل ښار معیاري اقتصادي ودې ته زمینه برابره شي