د کابل ښاروالۍ د کار، ساتنې او مراقبت ریاست له لوري له بنایي سیمې څخه د شاداب ظفر بلاکونو پر لور د قلعه زمان خان شپېته متره سړک د یوې لیکې وروستۍ (درېیمه) طبقه قیر چارې بشپړې او د دویمې لیکې یې پیل شوې. د قلعه زمان خان شپېته متره سړک په دوه اصلي او دوه فرعي لیکو کې د (۴۲۵۰) مترو په اوږدوالي جوړ شوی چې، اصلي لیکې یې (۱۲) متره سور لري. د یاد سړک د اصلي لیکو د قیر چارو تر بشپړېدو وروسته به د فرعي لیکو د پاتې برخو د جوړولو چارې هم پیل شي. دا سړک چې، د کابل ښار د ختیځ زون له اقتصادي دهلیزونو څخه شمېرل کیږي، په جوړېدو سره به یې د مکروریانونو څلورلارې، کارته نو او ور څېرمه سړکونو کې ترافیکي ګڼه ګوڼه کمښت ومومي