د کابل ښاروالۍ د کار، ساتنې او مراقبت ریاست له لوري د څلورمې او یوولسمې ناحیې اړوند، د لب جر او سرای شمالي څلورلارو تر منځ د سلطان محمود غزنوي سړک د جوړولو پاتې چارې چې، د یو لړ تخنیکي او حقوقي ستونزو له امله ځنډېدلې وې، بیاځلي پیل شوې. د ياد سړک د جوړولو چارې مخکې له يوه خصوصي شرکت سره قرارداد شوې وې، چې د بې پروايي او د قرارداد د مادو د نه مراعاتولو له امله نور ورته د کار کولو اجازه ور نه کړل شوه. د کابل ښاروالۍ مشرتابه ټینګار کوي چې، سړکونه باید د ډیزاین او تخنیکي سندونو له مخې په ټاکلي وخت جوړ او د چارو د ترسره کولو پر مهال دې صداقت او ایمانداري په پام کې ونیول شي ترڅو د ملي شتمنۍ له بې ځایه لګښت څخه مخنیوی وشي. ټاکل شوې ده د دغه سړک پاتې چارې چې،(۲۰۵۲) متره اوږدوالی او (۶۰) متره سور لري، د کانالونو، لښتیو، پلو لارو، د بایسکل چلولو لیکو او ګلدانونو په ګډون د روان کال په بهیر کې بشپړې شي. دغه پروژه د کابل په شمال کې د سړک جوړونې له مهمو پروژو څخه ده چې، په تېرو وختونو کې ورته پاملرنه نه ده شوې. یاده پروژه به د ښاري زیربناوو د پیاوړتیا په موخه چې، په دې سیمه کې د ترافیکې بهیر او ترانسپورت په برخه کې ځواب ویونکي وي، په لوړ کیفیت ترسره شي، ترڅو د ترافیکي بهیر د ویش سربېره، ښاریان سوکالي او هوساینه تجربه کړي