د استملاکي ملکیتونو او خنډونو تر پاکولو وروسته، د کابل ښاروالۍ له خوا د درېیمې او شپږمې ناحیې ترمنځ د کابل سیند په اوږدو کې له پُل سوخته سیمې څخه د پُل سرخ په لوري د نوي نښلوونکي سړک د جوړولو چارې پیل شوې. د کابل ښاروالۍ د پروژو اوبرنامو د تنظیم ریاست د زیربنايي پروژو آمر انجنیر محمد حامد سادات په دې هکله وویل: دغه نوی نښلوونکی سړک چې، د یوه پله او د یوه معیاري سړک د نورو برخو په ګډون (۹۱۰) متره اوږدوالی او (۳۰ ) متره سور لري، د روان کال په بهیر کې به جوړ شي. اوس مهال د دغه سړک د کیندنو، خاورې لیږدولو او لښتیو جوړولو په ګډون لومړنۍ چارې پیل شوې دې چې، د کار د کیفیت د تضمین په موخه به ترې په بېلابېلو پړاوونو کې تخنیکي او فني څارنې ترسره شي. نوموړي زیاته کړه، د تخنيکي سندونو له مخې به تر لابراتواري آزموینې وروسته، د سیخ ګریډ او کیفیت چې، دلښتیو په جوړولو کې کارول کیږي په ډاګه شي. د يادونې وړ ده، چې د کابل ښاروالۍ د کار، ساتنې او مراقبت رياست له خوا د ډیزاین له مخې، د (٣٠) مترو په اوږدوالي او د (۲۰) مترو په سور په دوه لینونو کې د یاد سړک په اوږدو کې د یوه پله د جوړولو چارې هم پیل شوې دي. د دغه سړک او پله په جوړیدو سره به د برچي عمومي سړک، د کارته چهار (۳۰) متره ، ګولايي دوخانې سړک او د کوټې سنګي ( میرویس میدان) څلور لارې ګڼه ګوڼه کمه او د سیمو اقتصادي ودې ته به زمینه برابره شي