د نهمې ناحیې اړوند د هوایي ډګر له څلورلارې څخه د کابل- جلال آباد سړک د ګمرک تر سیمې پورې د نوي نښلوونکي سړک د جوړولو چارې چې، څه موده وړاندې د کابل ښاروالۍ له لوري پیل شوې وې په چټکۍ سره روانې دي. اوس مهال په درېیو برخو کې، د کیندنو، خاورې لیږدولو، د لښتیو جوړولو او د پاتې استملاکي ملکیتونو په پاکولو کار روان دی. د هوايي ډګر له څلورلارې څخه تر ګمرک سیمې پورې نوی نښلوونکی سړک چې، ( ٢٧٩٤) متره اوږدوالی او (۶۰) متره سور لري، په دوه اصلي او دوه فرعي لیکو کې به د لښتیو، پلو لارو، ګلدانونو، د بایسکل چلولو لیکو، تم ځایونو او د یوه معیاري سړک د نورو برخو په ګډون په ۱۶ میاشتو کې جوړ او ورسره جوخت به د عامې روغتیا څلورلارې، مکروریانونو او ورڅېرمه سړکونو ترافیکي ګڼه ګوڼه کمه شي. د یادولو وړ ده چې، ددغه سړک د جوړولو چارې به په ټاکلي وخت او ښه کیفیت سره ترسره شي، ځکه د کابل ښاروالۍ د مشرتابه سر بيره، د دغې ادارې فني او تخنیکي ټیمونه تل د سړکونو د چارو له بهیر څخه څارنه کوي