د کابل ښاروالۍ د خپرونو او عامه پوهاوي ریاست په هڅونه، د ښاري کلتور دودولو او د ډله ایزو کارونو د ترسره کولو په موخه، په لومړۍ ناحیه کې د ونو او زرغونو سیمو د خړوبولو حشر ترسره شو. په دې حشر کې د کابل ښاروالۍ له مسئولینو سربېره، د عالمانو، ګذر وکیلانو او ځوانانو شوراګانو استازو ګډون کړی وو او ژمنه یې وکړه چې، د ښار د آبادۍ او زرغونتیا په برخه کې به له کابل ښاروالۍ سره مرسته کوي. د لومړۍ ناحیې مرستیال مولوي شمس الدین په خپلو خبرو کې ښاریان د ونو او زرغونو سیمو خړوبولو ته وهڅول او ویې ویل: د کابل ښاروالۍ د زرغونتیا ریاست دومره امکانات په واک کې نلري چې د ښار ټولې ونې او زرغونې سیمې خړوب کړي، له همدې امله د ټولو ښاریانو مرسته اړینه ګڼل کیږي. ورته مهال د کابل ښاروالۍ د خپرونو او عامه پوهاوي ریاست د عامه پوهاوي آمر محمد یاسین امین د اسلام له نظره د مسئولیت منلو او د ښاري کلتور دودولو په اړه معلومات وړاندې کړل او ویې ویل: په ښاري ژوند کې د هوساینې د تجربه کولو لپاره د مسئولینو او ښاریانو ترمنځ د پیاوړې همکارۍ شتون زموږ له ملي او دیني سپارښتنو څخه شمېرل کیږي او اسلام د نظم او جوړولو دین دی چې، دبشري ژوند د ټولو برخو لپاره ځانګړي اصول لري. د یادونې وړ ده چې، د یاد حشر په ترڅ کې د لومړۍ ناحیې اړوند سیمو کې ګڼ شمېر ونې او زرغونې سیمې خړوب شوې