ښاریانو ته د ترانسپورتي آسانتیاوو رامنځته کولو او د ښار د اقتصادي او معیاري ودې په موخه، د کابل - جلال آباد سړک د لومړۍ برخې د پراختیا او جوړولو لومړنۍ چارې د مکروریانو له څلورلارې څخه تر تنګي غارو پورې د کابل ښاروالۍ له خوا پیل شوې. د کابل ښاروالۍ د برنامو او پروژو د تنظیم رئیس انجینر میرالرحمن ناصري په دې هکله وویل: د دې مهم سړک لومړۍ برخه د مکروریانو له څلورلارې څخه تر پکتیا کوټ پورې (۹۳۹۷) متره اوږدوالی او (۶۰) متره سور لري چې، په عصري او معیاري توګه به د څه باندې (۶۸۰) میلیونه افغانیو په لګښت د کابل ښاروالۍ له بودجې څخه د (۲۴) میاشتو په موده کې په دوه اصلي او دوه فرعي لیکو کې جوړ شي. نوموړي زياته کړه، چې په دې پروژه کې د لښتيو، پلولارو، ګلدانونو، د بايسکل چلولو کرښو، تمځایونو، د څراغونو نصبول او په سړکونو باندې د کرښو اچول هم شامل دي. د کابل-جلال آباد سړک چې، د کابل ښار له اقتصادي دهلېزونو څخه شمېرل کېږي، جوړول او پراختیا یې د ماستر پلان مطابق د کابل ښاروالۍ له لومړیتوبونو څخه او د هېوادوالو یوه پخوانۍ هیله ده، چې د ترسره کېدو په حال کې ده. د یادونې وړ ده چې، د سړک جوړونې د دې لویې پروژې په لومړنیو چارو کې د استملاکي ملکیتونو او خنډونو پاکول، کیندنې او د خاورې لېږدول شامل دي