د شپږمې او اوومې ناحیې اړوند له دارالامان مانۍ څخه تر فیصل ښارګوټي پورې د (۳۱۷۶) مترو په اوږدوالي او (۳۳) مترو په سور سره د ګل باغ سړک د لومړۍ برخې د جوړولو او پراختیا چارې روانې دي. د کابل ښاروالۍ د برنامو او پروژو د تنظیم ریاست د مسئولینو په وینا؛ د دغه سړک د جوړولو په پروژه کې د لښتي، ګلدانونو، پلو لارو، د بایسکل چلولو لیکو، څراغونو نصبولو او د یوه معیاري سړک دنورو برخو جوړول شامل دي چې، چارې به یې د نږدې یوه کال په موده کې په بنسټیزه توګه بشپړې شي. اوس مهال د دې سړک د خاورې لېږدولو، لښتیو او پلو لارو جوړولو چارې په عملي توګه روانې دي. د ګل باغ سړک چې د کابل لوېدیځه برخه له سویل سره نښلوي، په راتلونکي کې به د شلمې ناحیې اړوند تر چهل دختران سیمې او کابل- لوګر لویې لارې پورې دوام ومومي