له څو ځله خبرتیا وروسته د کابل ښاروالۍ له لوري د کابل- جلال آباد سړک په اوږدو کې له مکروریانو څلورلارې څخه تر تنګي غارو پورې د نوي سړک د لومړۍ برخې د جوړولو او پراختیا پر وړاندې د شته استملاکي خنډونو د پاکولو چارې پیل شوې. د یاد سړک په اوږدو کې ۵۳۵ ملکیتونه او کورونه تر استملاک لاندې دي چې، د قانون له مخې به یې مالکانو ته بدیل حقونه ورکړل شي. د ۹۳۹۷ مترو په اوږدوالي او د ۶۰ مترو په سور سره له مکروریانو څلورلارې څخه تر پکتیا کوټ پورې د دې مهم سړک لومړۍ برخه د کابل ښاروالۍ له داخلي بودیجې څخه د څه باندې ۶۸۰ میلیونه افغانیو په لګښت د ۲۴ میاشتو په موده کې په دوه اصلي او دوه فرعي لیکو کې جوړېږي. د پلو لارو، لښتیو او ګلدانونو جوړول، د بایسکل چلولو کرښې، تم ځایونه، د څراغونو نصبول او د یوه معیاري سړک نورې برخې هم په دې پروژه کې شاملې دي