د ترافیکي نظم رامنځته کېدو په موخه، د کابل ښاروالۍ له لوري د اتمې ناحیې اړوند د رحمن مېنې د E برخې سړک د کرښو اچولو چارې پیل شوې. د کابل ښاروالۍ د برنامو او پروژو د تنظیم ریاست له زیربنايي پروژو څخه د څارنې آمر انجنیر حامد سادات په وینا؛ دا سړک ۳۳٠٠ متره اوږدوالی او ۱۱.۲، ۱۲.۵ او ۴۰ متره سور لري چې، د یوه معیاري سړک د ټولو برخو په ګډون یې چارې تېر کال پیل شوې وې، اوس مهال یې یوازې د پلولارو او تمځایونو جوړولو، کرښواچولو او د ترافیکي نښو د نصبولو چارې پاتې دي چې ډېر ژر به ترسره شي. نوموړي زیاته کړه: د کرښو اچولو په چارو کې پر سړک د متصل، منقطع ، د پلو لارویانو د ځای په نښه کولو او د ترافیکي نښو نصبول شامل دي. په واټونو او سړکونو د کرښو اچول د ښاري او ترافیکي نظم د رامنځته کېدو په برخه کې خورا ارزښت لري. انجنیر سادات ډاډ څرګند کړ چې، د کار د ښه کیفیت او په ټاکلي وخت د پروژې د پلي کېدو په موخه یې فني او تخنیکي څارنې ترسره کړې دي