د کابل ښاروالۍ له لوري د درېیمې ناحیې اړوند له دهمزنګ څخه تر کوټه سنګي( میرویس میدان) پورې د (۳۲۲۶) مترو په اوږدوالي او د (۳۰) مترو په سور سره د سړک د پراختیا او جوړولو چارې په چټکۍ سره روانې دي. د کابل ښاروالۍ د برنامو او پروژو د تنظیم ریاست د مسئولینو په وینا؛ د سړک جوړولو په دې پروژه کې د یوه معیاري سړک د ټولو برخو جوړول شامل دي چې، چارې به یې د روان کال تر پایه بشپړې شي. دغه راز د کابل ښار د ماستر پلان له مخې به تر جوی شیر پورې د یاد سړک پراختیا چارې هم ډېر ژر پیل شي، ترڅو د کابل ښار معیاري ودې ته زمینه برابره او د ښار په مرکزي برخو کې ترافیکي ګڼه ګوڼه کمښت ومومي.