د (۳۳۰۰) مترو په اوږدوالي او د (۱۱.۵، ۱۲.۵ او ۴۰) مترو په سور سره د رحمن مېنې د ( E) برخې سړک د جوړولو چارې چې، تېر کال د کابل ښاروالۍ لخوا پیل شوې وې د بشپړېدو په حال کې دي. د کابل ښاروالۍ د برنامو او پروژو د تنظیم ریاست د زیربنايي پروژو د څارنې آمر انجنیر محمد حامد سادات په دې هکله وویل: دغه سړک د یوه معیاري سړک د ټولو برخو په ګډون جوړېږي چې، اوس مهال یې د کرښو اچولو چارې په چټکۍ سره روانې دي او په نږدې ورځو کې به یې څراغونه او ترافیکي نښې هم نصب شي. نوموړي زیاته کړه چې، د کرښو اچولو په چارو کې، موازي،متصل، منقطع ،د پلو لارو دهلیزونه او ترافیکي سمبولونه شامل دي. په واټونو باندې د کرښو اچول د ترافیکي نظم او ښه مدیریت په برخه کې خورا ارزښت لري. انجنیر سادات له موټر چلوونکو غوښتنه وکړه ترڅو په کرښو د موټر له چلولو څخه ډډه وکړي ترڅو له ترافیکي پېښو مخنیوی وشي او کرښې ژر پاکې نشي. د یادونې وړ ده چې، د ځمکې د سر اوبو د مدیریت په موخه، د یاد سړک په اوږدو کې د (۱۰۰۵) مترو په اوږدوالي، د (۱.۵) مترو په سور او د (۱.۵) مترو په ژوروالي سره یو کانال هم جوړ شوی ترڅو د ځمکې د سر اوبه ولېږدوي او د سړک له ژر ویجاړېدو څخه مخنیوی وشي