د کابل ښاروالۍ د کار، ساتنې او مراقبت ریاست له لوري د دولسمې ناحیې اړوند د احمدشاه بابا مېنې د دیارلسم او څوارلسم بلاک ترمنځ د سړک قیر چارې بشپړې او د ترافیکو پر مخ پرانیستل شو. د سړک جوړولو په دغه پروژه کې چې، (۱۰۷۰) متره اوږدوالی او (۴۰) متره سور لري، د لښتي، پلو لارو، ګلدانونو جوړول او په سرک د کرښې اچول هم شامل دي. د کابل ښاروالۍ د کار، ساتنې او مراقبت ریاست د مسئولینو په وینا؛ د دې پروژې چارې (۹۰) سلنه مخته تللې دي او یوازې د پلو لارو، ګلدانونو او د کرښې اچولو چارې یې پاتې دي چې هغه به هم ډېر ژر بشپړې شي. د دې سړک په جوړېدو سره به د ښاریانو ګڼې ستونزې هوارې او ترانسپورتي آسانتیاوو ته به لاس رسی ومومي. دغه راز له ښاریانو غوښته کیږي چې د یاد سړک ساتنې ته پام وکړي ترڅو یې له ژر ویجاړېدو څخه مخنیوی وشي